न मैले केही पाउन

 न मैले केही पाउन लेखेँ न केही गुमाउन लेखेँ

न पाएँ न गुमाएँ , खाली आफैँ रमाउन लेखेँ

कोही सत्ताको दौडमा कोही बित्थाको होडमा

हार न जित खाली हात, लोक बिचित्रको देखेँ

सबै बोल्न पोख्त अपूर्व शब्द विन्यासको कला

सुन्ने खै कस्ले, मात्र आफैँ पोखिन खोजेको देखेँ

कसैलाई संसार कहर कसैलाई स्वर्गको रहर

यो भिडमा आफैंले आफैंलाई बिरानो देखें

कसैका परलोक सुधारका कुरा कसैका हातमा छुरा

यस होडमा सबैलाई एकै साथ, कालको मुखमा देखेँ

प्रभा अधिकारी

सूर्यविनायक-५

भक्तपुर

२०७७/१२/०३ मङ्गलबार