बुद्धको देश

बुद्धको अहिँसा परमो धर्मको उपदेश छरिएको देसमा

बन्दुकको नाल र तरवारको धारबाट शान्ति खोजिन्छ भने

धार्मिक सहिष्णुता खलबलिँदा र

भातृत्वको भावना विचलन हुँदा

देसमा सामाजिक परिवर्तन आएको सोचिन्छ भने

मलाई बुद्ध र बुद्धत्वको बारेमा सोध्न मन लाग्छ

शान्ति र परिवर्तनको अर्थ खोज्न मन लाग्छ

नेपाली कला, सौन्दर्य र इतिहास बोकेका

धरोहरहरु भत्काएर,नासेर

राष्ट्र विकासका संभावना खोजिन्छ भने

अर्कालाई लान्छना लगाएर गाली गरेर

आफूलाई पवित्र र दोष रहित सोचिन्छ भने

मलाई विनास र विकासलाई

समानार्थी शब्द भन्न मन लाग्छ

गाली गलौज नै पवित्र शब्द जस्तो लाग्छ

नेताका स्वार्थपूर्ण भाषण र शासनलाई

जनमत र जनसत्ता भनिन्छ भने

आफ्ना कल्मषलाई लुकाएर,छिपाएर

प्रतिपक्षको शब्द शब्दमा

जालसाजी खोजिन्छ भने

मलाई जनमत र जनसत्ताको अर्थ भ्रम लाग्छ

लोकतान्त्रिक अभ्यास प्रति नै शंका लाग्छ

स्वार्थ पुरा गर्न जनमतको हवाला दिएर

हत्या हिंसाका बाटो रोजिन्छ भने

हत्या, बलत्कार र अपहरणको जघन्य अपराधमा

आम माफीको मार्ग खोजिन्छ भने

मलाई हत्या हिंसा नै धर्म भन्न मन लाग्छ

जघन्य अपराध नै

मानव अधिकारको मर्म भन्न मन लाग्छ

राष्ट्रिय संस्कृति र अस्मिता

सामाजिक मान्यता र आस्थाहरुमा खलल आउँदा

राष्ट्रिय एकता, सद्भाव र सहिष्णुतामा विचलन छाउँदा

प्रत्येक नेपालीको छाती दुख्नु पर्छ

हरेक राष्ट्र प्रेमीको घाँटी सुक्नु पर्छ

राष्ट्र, राष्ट्रियता, लोकतन्त्र र मानव अधिकारको

सम्मान हुनुपर्छ

नेपाली कला र सौन्दर्यको संरक्षण र सम्बर्द्धन हुनुपर्छ

आफू नेपाली भएको गौरव गर्न सक्नु पर्छ

गौरव गर्न सक्नु पर्छ

प्रभा अधिकारी

सूर्यविनायक-५

भक्तपुर