पर्खेर बसेथें, तिमी आउने दिन औंलामा गनेर
सोचेकै थिइनँ, तिमी बाकसमा फर्किन्छौ भनेर
भन्दै थिएँ, गाम बेसी मेलापात सँगै गरौँला
हिड्यौ कुरै नसुनी, घरबारी उकासौँला भनेर
मेरा आँसुका बाँधले, रोकिएनन् तिम्रा पाइलाहरु
सम्झायौ बर्षामा चुहिने, छानो टाल्नु छ भनेर
बाबा आमा लालाबालाको, मुहार पनि हेरेनौ
लम्क्यौ उसै, यिन्कै भविष्य कोर्नु छ भनेर
मागेकी थिइन मैले, सुनका गहना तैपनि
उड्यौ तिम्रा हातका, बाला फेर्नु छ भनेर
डाँको छोडेर रोए पनि, मेरो आँसु पुछ्न
खोल्ने छैनौ नयन, छिनछिन डलर गनेर
एकान्तमा भक्कानिएर, निसासिंदै म रुँदा
आउने छैनौ फकाउन, मलाई "काली" भनेर
प्रभा अधिकारी
सूर्यविनायक-५
भक्तपुर
No comments:
Post a Comment